Accessibility links

Barack Obama Da Mitt Romney Sun Koma Bakin Daga


Shugaba Barack Obama na jam'iyyar Democrat (dama) da Mitt Romney na jam'iyyar Republican (hagu) a muhawara mai zafi da suka yi

Shugaba Barack Obama na jam'iyyar Democrat (dama) da Mitt Romney na jam'iyyar Republican (hagu) a muhawara mai zafi da suka yi

Kwana guda bayan muhawara mai zafi da suka yi, 'yan takrarar shugaban Amurka guda biyu sun koma fage su na yakin neman kuri'un jama'a.

Shugaba Barack Obama na Amurka da dan takarar jam'iyyar Republican mai kalubalantarsa, Mitt Romney, sun koma fagen yakin neman zabe, a bayan muhawara mai zafi da suka tabka jiya talata.

Mr. Obama yayi kira ga magoya baya yau laraba a Jihar Iowa, da su jefa masa kuri'unsu domin ya kammala aikin ci gaban da ya ce ya fara samu a kan batutuwan tattalin arziki.

A lokacin da yake magana game da muhawarar ta jiya, shugaban yace a zahiri, ajandar Romney mai matakai biyar, mataki guda kawai ta kusa na nuna gatanci ga attajirai.

Shi kuma Mr. Romney, ya fadawa magoya baya a Jihar Virginia cewa Mr. Obama ba ya da wata ajanda ta wa'adi na biyu kan karagar mulki. A ci gaba da kokarinsa na mayar da hankali a kan tattalin arziki, Romney yace shugaban ba ya da wani shirin kirkiro sabbin ayyukan yi kuma Amurkawa marasa karfi zasu fuskanci karin haraji har na dala dubu 4 a shekara idan aka sake zaben Mr. Obama.

Nan gaba a yau laraba, Mr. Obama zai tafi Jihar Ohio, yayin da Mr. Romney zai sake yada zango a wani yankin na Jihar Virginia.

Shugaba Obama yana fata cewar zai kara samun zabura daga irin rawar ganin da yayi a muhawarar jiya talata. Kuri'un neman ra'ayoyin masu jefa kuri'a da aka yi dab da kammala zaben sun nuna cewa Mr. Obama ya doke tsohon gwamnan na Jihar Massachussetts a muhawarar ta jiya, abinda ya sha bambam da muhawarar farko.
XS
SM
MD
LG