Accessibility links

Ina Ma'anar Riga-Kafi Da Amfaninsa Ga Yaki Da Cuta Kamar Polio?

  • Garba Suleiman

Ana diga ma wani yaro maganin rigakafin kamuwa da cutar shan inna, ko Polio.

Ana diga ma wani yaro maganin rigakafin kamuwa da cutar shan inna, ko Polio.

Dr. Lawal Aliyu Rabe, darektan Kiwon lafiya daga tushe a Jihar Katsina, yayi bayanin yadda a Hausance aka samu kalmar rigakafi da kuma dalilin da ake yinsa.

Darektan kula da lafiya tun daga matakin farko a jihar katsina, Dr. Lawal Aliyu Rabe, ya bayyana cewa Hausawa sun sanya ma hanyar kare jiki daga kamuwa daga cututtuka sunan rigakafi ne, domin nuna yadda ake sanya magani ya "riga" cuta shiga jikin mutum domin yin "kafi" ko mamaye wurin da cutar zata nemi kamawa.

Dr. Rabe yace ana ce "rigakafi" ne domin bayyana wanda ya riga yin kafi a tsakanin cutar da kuma magani, domin wadansu cututtukan su na da wuyar yin magani idan sun riga yin kafi a jikin mutum.

Kwararren likitan, wanda yayi magana a zauren taron yaki da cutar Polio da Muryar amurka ta gudanar kwanakin baya a garin Katsina, yace yawancin ana yin rigakafin ne domin cututtuka irinsu shan inna ko Polio, watau cututtukan da kwayar cuta mai suna Virus take haddasawa.

Amma kuma yace akwai wasu cututtukan da wasu kwayoyin cutar ma suke haddasawa, kamar cutar nan ta tarin fuka wadda yace ita ba Virus ce ke haddasawa ba.

Ga cikakken bayanin da kwararren likita Dr. lawal Aliyu Rabe yayi game da salsalar kalmar "Rigakafi" da dimbin amfanin yin hakan.
XS
SM
MD
LG