Accessibility links

Koriya Ta Kudu Da Japan Sun Yi Marhabin Da Shawarar Koriya Ta Arewa


Koriya ta Kudu da Japan sun yi marhabin da shawarar Koriya ta Arewa, ta komawa ga shawarwarin kasashe da dama a kan shirinta na nukiliya, amma sun ce zasu ci gaba da aiwatar da takunkumin da aka kafawa Pyongyang a bayan gwajin nukiliyar da ta yi.

Mataimakin ministan harkokin wajen Koriya ta Kudu, Yu Myung-hwan, yayi kashedi a yau laraba cewar za a sassauto da takunkumin Majalisar Dinkin Duniya a kan Koriya ta Arewa ne kawai idan har aka samu ci gaba wajen kawar da shirin nukiliyar Pyongyang a tattaunawar da za a yi.

Shi ma kakakin gwamnatin Japan yayi irin wannan kashedi a birnin Tokyo, yana mai fadin cewa Japan zata ci gaba da yin aiki da takunkumin har sai an samu ci gaba a tattaunawar da za a yi.

A yau laraba Koriya ta Arewa ta ce zata koma kan teburin shawarwari muddin dai za a tattauna batun dage takunkumin kudi wanda Amurka ta sanya mata.

XS
SM
MD
LG