Accessibility links

Barack Obama Shi Ne dan Takarar Shugaban Kasa Na Jam'iyyar Democrat A Amurka


Sanata Barack Obama ya zamo dan takarar shugaban kasa na jam'iyyar Democrat a nan Amurka.

Sanata Obama, mai shekaru 46 da haihuwa, wanda karonsa na farko ke nan da zamowa dan majalisar dattijai daga jihar Illinois, yayi magana a gaban dubban magoya bayansa cikin daren talata a birnin St. Paul a Jihar Minnesota, a cikin dakin taron da 'yan jam'iyyar Republican zasu tabbatar da John McCain a zaman dan takararsu a cikin watan Satumba.

Obama shi ne bakar fata na farko da ya zamo dan takarar shugaban kasa na wata babbar jam'iyya a tarihin Amurka. Jiya talata ya samu wakilai da suka zarce dubu biyu da dari daya da goma sha takwas da ake bukata don zamowa dan takara, a bayan da ya samu karin goyon bayan wakilai masu zaman kansu, ya kuma doke abokiyar hamayyarsa Hillary Clinton a daya daga cikin jihohi biyun da suka gudanar da zabe jiya talatar.

Obama, wanda ya lashe zaben karshe na Jihar Montana, ya yabawa Uwargida Clinton a zaman jagorar da ta karfafa fata a zukatan miliyoyin jama'a.

Ita ma Clinton, wadda ta lashe zaben Jihar Dakota ta Kudu, ta yaba ma Obama a lokacin jawabin da ta yi a New York. Amma kuma ta ki yarda ta yarda cewar ta sha kaye, tana mai fadin cewa zata tuntubi magoya bayanta da shugabannin jam'iyya kafin ta yanke shawara.

XS
SM
MD
LG