Accessibility links

An Harbo Jirgin Helkwafta Na Sojojin Amurka A Iraqi - 2003-11-03


An kabo wani makeken jirgin saman helkwafta na sufuri na sojojin Amurka a Iraqi, inda aka kashe sojojin Amurka su akalla 15, wasu fiye da 20 kuma suka ji rauni.

Shaidu sun ce wadannan jiragen helkwafta kirar Chinook suna tafiya a jere a kusa da garin Fallujah, a lokacin da wasu makamai masu linzami akalla guda biyu suka harbi daya daga cikinsu. Wani kakakin rundunar sojojin Amurka ya ce ana binciken wannan lamarin.

A nan Washington, sakataren tsaron Amurka, Donald Rumsfeld, ya bayyana kabo wannan jirgi a zaman mummunar rana ta alhini da bakin ciki ga Amurka, yana mai lasar takobin cewa za a murkushe wadanda suka harbo jirgin.

Wannan harin shi ne mafi muni da aka kai a kan sojojin Amurka tun lokacin da shugaba Bush ya ayyana karshen mummunan fada a Iraqi watanni shida da suka shige.

Hukumomin Amurka sun ce an kai hari kan wadannan jiragen helkwafta biyu dake dauke da sojoji daga runduna ta 82 ta mayakan sama a kan hanyarsu ta zuwa filin jirgin saman Bagadaza, daga inda za su tafi hutu.

A can wani gefen kuma, na kashe wani sojan Amurka jiya lahadi a Bagadaza, a lokacin da wani bam ya tashi a gefen hanya daidai lokacin da kwambar motocin sojoji ke shigewa.

A can garin Fallujah kuma, an kashe wasu Amurkawa fararen hula su biyu dake aiki ma rundunar injiniyoyin sojan Amurka a lokacin da bam ya tashi a gefen motarsu. Gidajen telebijin sun nuna 'yan Iraqi, cikinsu har da wani yaro dauke da hular kwano ta wani sojan Amurka, suna rawa da tsalle sun kewaye garwar motar.

XS
SM
MD
LG