Accessibility links

Amurka Zata Bayar Da Tukuici Ga Duk Wanda Ya Kamo Charles Taylor - 2003-11-07


Shugaba Bush ya bayar da iznin biyan tsabar kudi dala miliyan biyu tukuici ga duk mutumin da ya kamo tsohon shugaban kasar Liberiya, Charles Taylor, wanda ke zaman gudun hijira a Nijeriya.

Wannan kudin tukuici yana kunshe cikin dokar kasafin kudi dala miliyan dubu 87 na gudanar da ayyukan sojan Amurka a Iraqi da Afghanistan.

A jiya alhamis shugaba Bush ya sanya hannu kan dokar kasafin.

Za a yi amfani da kudin tukuicin na Liberiya domin kamo abinda dokar kasafin ta bayyana a zaman "wani mutumin da kotun bin kadin laifuffukan yaki a Saliyo ta tuhuma."

Ba a bayyana sunan wannan mutumi a cikin dokar kasafin ba. Amma kuma majiyoyin gwamnati da na majalisar dokokin Amurka sun shaidawa Muryar Amurka cewa ana batun Charles Taylor ne.

A watan Yuni wannan kotu ta musamman ta MDD ta tuhumi tsohon shugaban na Liberiya a saboda goyon bayan da ake zargin ya bayar ga 'yan tawayen kasar Saliyo.

XS
SM
MD
LG