Accessibility links

Hukumomin Najeriya Sun Kama Dan'uwan Henry Okah


Henry Okah, kwance bayan motar jami'an tsaro a Afirka ta Kudu bayan da aka fito da shi daga kotu a Johannesburg, inda ake tuhumarsa da ta'addanci dangane da hare-haren bam a Abuja, Najeriya.

Henry Okah, kwance bayan motar jami'an tsaro a Afirka ta Kudu bayan da aka fito da shi daga kotu a Johannesburg, inda ake tuhumarsa da ta'addanci dangane da hare-haren bam a Abuja, Najeriya.

Wata majiyar tsaro ta ce an kama Charles Okah a Lagos aka tafi da shi Abuja bisa zargin ya tallafa da kudin shirya kai harin na Abuja

Hukumomin Najeriya sun kama dan'uwan tsohon madugun tsagera Henry Okah, bisa zargin cewa shi ma da hannunsa a tagwayen hare-haren bam na mota da suka kashe mutane 12 a Abuja.

Wata majiyar tsaro ta fadawa 'yan jarida jiya lahadi cewa an kama Charles Okah a Lagos, aka tafi da shi Abuja. Suka ce ana zargin ya samar da kudin kai hare-haren na ranar 1 ga watan Oktoba.

Har ila yau majiyar ta zargi Charles Okah da laifin aikewa da sakonnin Email a madadin kungiyar tsagera ta MEND, wadda ta dauki alhakin kai hare-haren. Sakonnin Email da kungiyar MEND ke aikawa a koyaushe tana dauke da sunan Jomo Gbomo ne, kuma daga adireshi na Yahoo ake aikawa.

AS farkon wannan wata aka kama Henry Okah a Afirka ta Kudu, aka tuhume shi da aikata ta'addanci bisa zargin cewa shi ne ya kitsa kai hare-haren na bam. Okah, wanda aka yi imanin cewa shi ne tsohon madugun kungiyar MEND, ya musanta cewa da hannunsa a wannan lamarin.

Hukumomin Najeriya sun tsare wasu mutanen su tara dangane da wadannan hare-hare.

XS
SM
MD
LG