Accessibility links

Jigawa Ta Shirya Ba Yara Miliyan 1 Da Dubu 200 Rigakafin Polio

  • Garba Suleiman

Gwamna Sule Lamido na Jihar Jigawa, yana hira a VOA

Gwamna Sule Lamido na Jihar Jigawa, yana hira a VOA

A zagayen bayarda maganin rigakafin Polio na watan Satumba da aka yi cikin makon da ya shige an hada har da tasoshin mota 86 a jihar

Gwamnatin Jihar Jigawa ta ce yara miliyan daya da dubu dari biyu ta shirya ba maganin rigakafin kamuwa da cutar shan inna, ko Polio, a zagayen watan Satumba na wannan aiki da aka yi a makon da ya shige.

Kwamishinan ayyukan kiwon lafiya na Jigawa, Dr. Abubakar Tafida, ya ce ya zamo tilas su kara azamar aikin a saboda an samu bullar sabbin kamuwa da cutar ta shan inna wasu jihohi makwabtan Jigawa.

Sai dai har yanzu ba a samu alkaluma na adadin wadanda aka samu nasarar ba su maganin a lokacin wannan aiki ba.

A yunkurinta na kara azamar kawar da wannan kwayar cuta ta Polio, gwamnatin jihar ta Jigawa ta girka karin masu bayar da maganin a tasoshin mota 86 cikin jihar domin tabbatar da cewa dukkan yara masu shigowa cikin jihar ko biyowa ta cikinta, sun samu wannan magani.

A lokacin wannan aikin na Satumba, an sanya malamai da sarakuna da kuma shugabannin kungiyar direbobi ta Najeriya cikin masu zaburar da mutane da kuma taimakawa wajen cimma nasarar aikin.
XS
SM
MD
LG