Mutane biyu sun hallaka a Najeriya sakamakon bindiga da wani bututun mai ya yi

Kafofin yada labarai a Najeriya da wasu shaidu sun bada labarin cewa wani bututun mai yayi mummunar bindiga ya kama da wuta har ya halaka mutane biyu.‘Yansanda suka ce akwai alamun da gan-gan wani ya fasa bututun da yayi bindiga, ya kama da wuta yayin da wasu suke dibar mai a garin Amukpe dake kudancin jihar Delta. Kakakin rundunar ‘yansandan jihar Charles Muka, yace bashi da bayanin yawan mutane da suka halaka, ya kuma ce hukumomi suna gudanar da bincike. Bututun mallakar kamfanin mai na Nijeriya watau NNPC ne.