Wata Kungiya mai tsattsauran ra’ayin Islama a Nijeriya, ta ce ita ce ta tayar da bama-bamai ta kuma kai hare-haren ranar jajebirin Kirsamati, wadanda su ka hallaka a kalla mutane 86.
Kungiyar ta Boko Haram ta ce za ta cigaba da kai hare-hare kan wadanda ta kira, marasa imani.
Hukumomi a Nijeriya sun ce mutane akalla 80 sun mutu a garin Jos da ke tsakiyar kasar, inda aka auna bama-bamai kan masu sayayyan karshe na bikin Kirsamati.
A wannan ranar ce kuma, aka kai hare-hare kan wasu Majami’u a birnin Maiduguri na Arewacin Kasar, inda aka kashe akalla mutane shida.
Hare-haren sun tayar da tashe-tashen hankula a Jos ranar Lahadi tsakanin Musulmi da Kirista. An banka wa gine-gine da dama wuta a lokacin yamutsin kuma ‘yan sanda sun ce sun damke a kalla mutane uku.
Gwamnatin Nijeriya dai ta ce wannan yamutsi na baya-bayan nan an tayar da shi ne da manufa ta siyasa, da zummar kawo zaman dar-dar tsakanin Musulmi da Kirista kafin zaben shugaban kasa da za a gudanar a watan Afrilu.
Shugaban Nijeriya Goodluck Jonathan ya sha alwashin farauto wadanda su ka kai harin bama-baman jajebirin ranar Kirsamatin.
