Bisa ga cewar asusun UNICEF, dole cibiyoyi da masu ruwa da tsaki su kara kokari a wannan fannin idan ana son cimma nasarar rage yawan mace macen kananan yara.
Asusun ya bayyana cewa rabin adadin kananan yara kasa da shekaru biyar da suke mutuwa a duniya daga Najeriya suke. Cibiyar UNICEF tace yara da yawa suna mutuwa ta dalilin kamuwa da zawo wanda aka fi samu tsakanin kananan yaran da suke zama a gidaje marasa tsabta ko shan ruwa marar tsabta.
Bisa ga binciken asusun UNICEF yaran da suke zaune a yankunan karkara sun fi kamuwa da zawo sakamakon rashin yanayi da ruwa mai tsabta.
Akwai mutane miliyan 66 da basu da ruwa mai tsabta a Najeriya daga cikin miliyan 783 da suke fama da rashin ruwa a duniya baki daya.