Accessibility links

Shan Lemun Kwalba da Aka Hada da Sukari Na Iya Haddasa Kiba da Cutar Sukari


Ginin majalisar karamar hukumar birnin San Francisco dake nan Amurka wanda ya yi dokar shan lemun kwalba

Ginin majalisar karamar hukumar birnin San Francisco dake nan Amurka wanda ya yi dokar shan lemun kwalba

Daga yanzu hukumomi a birnin Farancisco dake nan Amurka, sun bada umarnin duk wata tallar lemun kwalba a bainar jama'a, sai ya hada da gargadin cewa, shan lemun yana iya janyo kiba, duk da kalubalen da kamfanonin sarrafa lemun suka yi cewa, sa su suyi haka ya sabawa 'yancinsu na magana.

Gargadin zai ce "shan lemu da aka karawa sukari yana iya haddasa kiba, da cutar sukari watau diabetes, da kuma rubewar hakori." Tilas a duk tallace-tallacen lemun da wasu kayan shaye shaye na zamani da aka karawa sikari, da ake tallarsu akan irin manyan allunan tallan nan, ko a jikin motoci kiya-kiya, ko a tashoshin shiga mota, ko akan manyan takardu, ko a dandalin wasanni a birnin na San Francisco.

Sai dai ba za'a bukaci wannan gargadin ba, a tallace tallacen da kamfanonin zasu yi a gidajen talabijin ko rediyo.

Illahirin kansiloli a majalisar karamar hukumar birnin ne suka amince da wannan doka wacce zata fara aiki ranar 25 ga watan Yuli. Haka nan dokar ta haramtawa rassa da hukumomi gwamnatin karamar hukumar daga amfani da kudaden daga baitul malin gwamnati wajen saye lemunan da aka karawa sukari.

XS
SM
MD
LG