Shugaban kasar Iran ya musanta zargin Amurka na cewa da hannun gwamnatin kasar Iran din a cikin wata makarkashiyar neman kashe jakadan kasar Saudiyya a nan Amurka.
A yau Lahadi shugaba Mahmoud Ahmadinejad ya fada cewa Iraniyawa mutane ne masu wayewar kai, kuma ba sa bukatar yin amfani da hanyar yin kisan gilla.
Babban shugaban addinin kasar Iran Ayatollah Ali Khamenei ya fada a jiya Asabar cewa ikirarin na Amurka ba shi da kan gado, sannan ya zargi Amurka da yin zargin da ba tushe akan wasu ‘yan kasar Iran kalilan da ke kasar Amurka a kokarin ta na neman maida Iran saniyar ware.
