Babban Bankin Duniya ya yi kira ga gwamnatocin kasashen nahiyar Afrika su kara kaimi wajen hana al’ummarsu ci gaba da kamuwa da cutar kanjamau.
Babban Bankin Duniyan ya bayyana cewa, idan ba a dauki kwararan matakai ba, shawo kan cutar zai zama da wuya sakamakon karuwar masu kamuwa da cutar.
Bankin ya kwatanta yaki da cutar shan inna da masu karbar kudin fansho, inda a kullum ake samun Karin wadanda suke shiga tsarin. Ya kuma shawarci gwamnatoci su kara kaimi wajen shawo kan yaduwar cutar.
An sami Karin tallafin kudin da ake bayarwa a yaki da cutar kanjamau daga dala miliyan 260 a shekara ta 1996 zuwa biliyan 15 a shekara ta 2010. Sai dai babban magatakardar Majalisar Dinkin Duniya Ban Ki-moon ya yi kira ga masu bada tallafi su kara bada gudummuwa domin cimma burin tara kimanin dala biliyan 24 da aka kiyasta kashewa a shekara domin yaki da cutar HIV.
Kasashen nahiyar Afrika sun ci gaba da kasancewa inda ake fama da cutar duk da yake nahiyar tana da kashi 12% ne kawai na adadin al’ummar duniya.
