WASHINGTON DC —
Amurka tana tayin zata bada tukuicin dala milyan biyar, ga duk wanda zai bata bayanai da zasu kai ga kama wani shugaban kungiyar ISIS mai suna Abu Mohammed al-Shimali.
Ma'aikatar harkokin wajen Amurka tace Al-Shimali ne mai shirya wa mayakan sakai hanyoyin zuwa Syria daga Turkiyya domin shiga cikin kungiyar ta ‘yan yakin sa kai.
Hukumomi sun hakikance da cewa shine yake kula da "ayyukan sumogal, da aikewa da kudade, da kuma jigilar kayayyaki zuwa Syria da Iraqi da aka kawo daga Turai, da Afirka ta yamma, da kuma zirin Arabiya. Kamar dai yadda sanarwar da ma'aikatar harkokin wajen Amurkan ta baiyana.
