‘Yan majalisun da suka fito daga bangaren jam’iyyar adawa a kasar Saliyo sun kalubalanci shugaban kasar Ernest Boi Koroma game da korar mataimakinsa Sam-Sumana da ya yi, inda suka ce wannan yiwa dokar kasar karan-tsaye ne.
Babban sakataren ‘yan jam’iyyar adawar kasar Sulaiman Banja-Sie ya fadawa Muryar Amurka cewa sun fara kalubalantar wannan hukunci na a gaban babbar kotun kasar.
Sannan kuma suna kira ga ‘yan majalisar kasar da su fito zanga-zangar lumana don nuna rashin amincewarsu da wannan al’amari yana mai cewa bakaken hulunan da za su saka a kawunansu alama ce ta nuna rashin amincewarsu.
Ya jaddada cewa jam’iyyarsu mai bin doka da oda ce don haka ba fito na fito za su yi da kowa ba.
Sun ce sun bawa gwamnatin kwanaki bakwai kacal su janye maganar korar Sam-Sumana wanda kuma jam’iyyarsa ta kora bisa zargin su ga don ta da zaune-tsaye da kafa sabuwar jam’iyya.
‘Yan adawar sun ce shugaban kasar ya yi amfani da dokar kundin tsarin mulkin da ba a amfani da ita wajen tsige Sumana.
