An yi jana’izar Rev. Musa Tsakani mai bisharar da ake kyautata zaton shine yafi kowanne limamin kirista a arewacin Najeriya tsufa da kuma dadewa a aikin bishara.
An haifi Rev Musa Tsakani a ranar biyar ga watan biyu na shekarar alib dubu da dari tara daidai a Dot, karamar hukumar Dass ta jihar Bauchi. Ya tuba zuwa addinin Kirista a shekara ta dubu da dari tara da ishirin da shida. Ya kuma fara makarantar Littafi Mai Tsarki a shekara ta dubu daya da dari tara da ishirin da tara zuwa da talatin. Rev. Musa Tsakani yayi ayyukan Bishara a jihohi da dama a Najeriya. Ya yi ritaya a cikin shekara ta dubu da dari tara da tamanin da takwas.
Ya rasu ya bar matarsa alheri da ‘ya’ya takwas da jikoki talatin da uku da tattaba kunne ishirin da takwas. Jama’a daga ciki da wajen Najeriya da suka halarci jana’izarsa sun bayyana marigayin a matsayin mai tsoron Allah da hada kan al’umma wanda yake rungumar kowa ya kuma kasance uba ga kowa ba tare da kula da banbancin kabila ko addini ba.
A cikin jawabinsa, sarkin Dass mai martaba Usman Bilyaminu Usman ya bayyana marigayin a matsayin uba mai hangen nesa wanda ya bada gudummuwa ga ci gaban kasancewar masarautar tsintsiya madaurinki daya.
Wakiliyarmu Zainab Babaji ta halarci jana’izar ta kuma hada wannan rahoton.
