WASHINGTON — Yau, 11 ga watan nan na Nuwamba, ta ke Ranar Tunawa da Mazan jiya a nan Amurka, wanda lokaci ne na hutu a kasar baki daya, don karrama dukkannin dakarun da su ka kare Amurka a dukkannin yake-yaken da aka yi.
Wannan ita ce ranar tunawa da mazan jiya na farko da ta zo bayan da dakarun Amurka su ka fice daga Iraki cikin watan Disamban bara. Ranar Tunawa da Mazan Jiya ta wannan shekarar kuma wata dama ce ga Amurkawa ta nuna godiya ga baraden yakin duniya na biyu, da yawansu ke ta raguwa sosai.
Shugaban Amurka kan ajiye furanni a kowace ranar tunawa da mazan jiya, a kaburburan dakarun da ba a sansu ba, a makabartar tarayya da ke Arlington.