Hukumomi a birnin Moscow sun yanke shawarar daina nuna kwallon kafar cin kofin duniya a manyan allunan majigi, a bayan da dubban 'yan kallo suka tayar da tarzomar da ta kashe mutum guda, ta raunata wasu da dama.
Wannan tarzoma ta barke jiya lahadi a tsakiyar birnin Moscow, a lokacin da kasar Japan ta doke Rasha da ci daya mai ban haushi a karawar ad suka yi a rukuninsu.
Kafofin labaran Rasha sun ce mutane akalla 20 sun ji rauni a wannan tarzoma. 'Yan sanda suka ce 'yan kallo, wadanda suka yi ta shan barasa a duk tsawon lokacin da ake nuna wasan, sun kona motoci da dama, suka mirgina wasu da dama.