Accessibility links

Nasarar Trump a Indiana ta sa Cruz janyewa daga takarar shugaban kasa a jam'iyyar Republican


Donald Trump ke nan yana godewa magoya bayansa jiya bayan ya kada abokin hamayyarsa Ted Cruz

Donald Trump ke nan yana godewa magoya bayansa jiya bayan ya kada abokin hamayyarsa Ted Cruz

Senata Ted Cruz, mai wakiltar jihar Texas a majalisar dattawan Amurka ya janye daga takarar shugabancin Amurka, bayanda attajirin nan Donald Trump yayi masa mummunar kaye a zaben fidda gwani da aka yi a jihar Indiana, jiya Talata.

Cruz, ya gayawa magoya bayansa a birnin Indianapolis cewa, "babu damar ya ci gaba, domin masu zabe sun gwammace wani."

Trump ya sami gagarumar nasara a zaben na jihar Indiana, senata Cruz yazo na biyu, sannan gwamnan jihar Ohio John Kasich yazo na uku.

Trump ya "yaba da irin nasarar da ya samu a jihar Indiana," daga nan ya yabawa Cruz,da kuma sauran 'yan takara su 15 wadanda ya kira gwarzaye masu basira. Daga nan yayi kira da a hada kai a jam'iyyar ta Republican.

Shugaban jam'iyyar Republican Reince Priebus, ya kira Trump a zaman "dan takarar jam'iyyar mai jiran gado".

Amma wani kakakkin gwamnan jihar Ohio wanda yake takara har yanzu yana cewa, gwamnan har yanzu yana ganin za'a fafata a dandalin babban taron jam'iyyar a watan Yuli, inda yake ganin zai sami nasara idan zabe yaje zagaye na biyu.

A bangare 'yan Democrats kuma, an ayyana senata Bernie Sanders, ya doke madam Hillary Clinton a zaben na Indiana.

Duk da nasarar da Sanders ya samu a jihar Indiana, Clinton tana gaba dashi nesa ba kusa ba a yawan wakilai, kuma kusan za'a iya cewa da wuya ace ya cimmata.

Ted Cruz wanda ya sha kaye a Indiana ya kuma janye daga takarar

Ted Cruz wanda ya sha kaye a Indiana ya kuma janye daga takarar

XS
SM
MD
LG