WASHINGTON, D. C. - An dai zargi hukumar gudanarwar katafaren kantin da karin kudi akan wanda ke rubuce akan kayayyakin dake kan kanta.
Mataimakin shugaban riko na FCCPC Adamu Ahmed Abdullahi ne ya jagoranci samamen rufe kantin.
Da yake zantawa da manema labarai a yayin samamen, Abdullahi ya ce binciken farko da hukumar ta gudanar ya tabbatar da cewa hukumar gudanarwar kantin na ha’intar abokan cinikaiyya.
Ya kara da cewa shagon zai ci gaba da kasancewa a rufe har sai an kammala bincike.
“Abin da muka gano cewa wadannan mutane suna yi shi ne yaudarar farashi da rashin bayyana gaskiya a farashin, wanda ya saba wa sashe na 115 (3) na dokar da ta ce ba a bukatar mabukaci ya biya farashin wani kaya ko sabis mafi girma fiye da wanda yake rubuce a jikin kayan ba.”
“Sashi na 155 ya tanadi cewa duk wani kamfani da ya sabawa wannan doka, zai biya tarar Naira miliyan 100 ko ma fiye da haka kuma daraktocin kamfanin da kansu suna da alhakin biyan Naira miliyan 10 ga kowanne ko kuma daurin watanni shida a gidan kaso ko kuma duka biyun.
“Abunda muka aiwatar a yau shi ne mu tabbatar sun bi doka. Da farko mun kira su don su zo su kare kansu, amma ba su amsa kira ba. Daga baya sai suka aika da lauya wanda muka tambaye shi ko ya san gaskiyar lamarin. Sai Yace a’a
"Idan suna so a sake bude kantin, dole ne su tabbatar da cewa sun yi abin da doka ta buƙaci su yi."
Hakan na zuwa ne bayan da gwamnatin tarayya tare da hadin gwiwar gwamnonin jihohin kasar suka amince da kafa wani kwamiti da zai tunkari matsalar boye kayan masarufi a fadin kasar.
Dandalin Mu Tattauna