WASHINGTON, DC —
Yayin bude taron kolin kungiyar da ake yi na shekara-shekara, Nkosazana Dlamini Zuma ta ce wannan mataki da Amurkan ta dauka ya shafi daukacin nahiyar ta Afrika.
Matakin haramta shigar Amurkan dai ya shafi kasashen Libya da Somalia da kuma Sudan, wadanda mafi rinjayen al’umominsu Musulmi ne.
Madam Dlamini Zuman, ta kara da cewa wannan mataki zai kara dagula dangantakar kasashen da Amurka, domin tun a baya ma, dangantakar dake tsakaninsu ta na da rauni.
Ministan harkokin wajen Somalia, Abdisalam Omer, ya fadawa Muryar Amurka cewa har yanzu kasarsu na da kyakyawan zaton cewa dangantakarsu da Amurka za ta samu daidaito, yana mai cewa ya yi wuri a nuna damuwa kan matakin Amurka, duk da cewa abin damuwa ne.
