Zamanin kimiyya da fasaha ya zo da abubuwa da dama, wanda wasu na ganin akwai alfanu kuma akwai rashin shi ga wannan zamanin na “Technology” a turance. A wasu bincike da aka gudanar a wannan zamanin, akwai abubuwa da dama da suka saukaka yadda matasa ke gudanar da rayuwar su cikin sauki da cigaba.
Daukar hoton kai-da-kai wanda ake cema “Selfie” masana naganin shi a matsayin wani abu da ke da matsaloli da dama ga matasa, kama da ga rage karfin ido, a dai-dai lokacin da ake sa hasken wutar waya a lokacin da ake daukar hoto, domin kusancin ido da hasken. Sai yadda abun ke taba kwakwalwa, da abubuwa da dama makamantan haka.
Wani sabon salo da matasa musamman ‘yan-sakandire keyi yanzu shine, sukan zabi makarantar jami’a da suke son zuwa, ta duba wane mataki makarantar take a wajen saka hotunan dalibai, da na gine-ginen makarantar a shafin su na “Intagram” Yanzu haka dai matasa sukan duba suga mutane, nawa ke nuna sha’awar ta makaranta kamin su yi matsayar ko zasu je makarantar kokuwa. A takaice za’a iya cewar shafufukan yanar gizo na taimakawa, wajen dalibai su zabi irin makarantar da zasu je da irin abokai da zasu sama a makarantun ta duba shafufukan yanar gizon makarantar.
