Accessibility links

Labari da Dumi-Duminsa

Barack Obama Yace Ba Ya Da Shirin Bakanta Hillary Clinton A Idanun Masu Jefa Kuri'a


Mai neman tsayawa takarar kujerar shugabancin Amurka karkashin inuwar jam’iyyar Democrat, Barack Obama, ya ce ba ya da shirin daukar matakan bakanta abokiyar hamayyarsa, Hillary Clinton, a yayin da suka mayar da hankali ga sauran jihohin da suka rage a wannan takara.

A cikin hirar da yayi da wani gidan rediyo, Sanata Obama yayi watsi da rahoton da jaridar Washington Post ta buga cewar watakila zai buga tallace-tallace masu bakanta abokiyar hamayyar tasa. Yace yana son ya ci gaba da abinda ya saba na yin magana kan batutuwan dake addabar jama’a a yayin da yake kokarin shawo kan masu jefa kuri’a a jihohin Indiana da Carolina ta Arewa wadanda zasu gudanar da zabubbukansu ranar 6 ga watan Mayu.

Sanata Clinton ta doke Obama da kusan maki 10 a zaben da aka yi jiya talata a Jihar Pennsylvania. Clinton ta fadi yau laraba cewar wannan nasara ta nuna cewa zata iya gina harsashin da ake bukata na masu jefa kuri’a don lashe kujerar shugabancin Amurka.

XS
SM
MD
LG