Sojoji Uku Sun Mutu Lokacin Da Jirgin Saman Sojan Amurka Ya Fadi A Afghanistan - 2002-06-13

Ma'aikatar tsaron Amurka, Pentagon, ta ce sojoji uku sun mutu jiya laraba da maraice a lokacin da wani jirgin mayakan Amurka ya fadi a yankin gabashin Afghanistan.

Ma'aikatar ta Pentagon ta ce sauran mutane bakwai dake cikin jirgin sun kubuta da raunukan da suka kama daga karaya a kafa zuwa tabo da kwarzane.

Jirgin ya fadi a lokacin da ya tashi kusa da madatsar ruwa ta Bande Sardeh, kilomita 60 a kudu maso yamma da garin Gardez. Sojojin Amurka sun jima suna farautar mayakan al-Qa'ida da na Taleban a wannan yankin.

Pentagon ta ce ba a san musabbabin faduwar wannan jirgi ba, amma kuma ta ce babu wata alamar cewa an harbo shi ne.

Wannan jirgi samfurin MC-130, wanda ake wa lakabi da sunan "Combat Talon", an kera shi ne musamman domin kutsawa da sojoji zuwa can cikin yankin abokan gaba.