Babban Atoni Janar din kasar Saudiyya, ya tabbatar da tsare wasu mutane 208, a wani wagegen binciken badakalar cin hanci da rashawa da ake yi, wanda aka yi kiyasin an salwantar da sama da dala biliyan 100 cikin shekaru da dama.
A wata sanarwa da ya fitar a jiya Alhamis, Saud al Mojeb, ya ce an saki mutane bakwai daga cikin wadanda ake tsare da su, yayin da 201 ke ci gaba zama a hannun hukuma.
Sannan ya ce gwamnati ta rufe asusun adana kudade kusan dubu-daya-da-dari-bakwai da ke bankuna.
Masu sukar gwamnatin Saudiyya, sun ce wannan bincike, wani yunkuri ne na yin waje-road da manyan jami’an gwamnatin kasar da kuma kare ‘yan adawa daga shiga harkokin gwamnati domin a dama da su, yayin da Yarima Mohammad Bin Salman mai shekaru 32 yake jagorantar sabuwar hukumar da ke yaki da cin hanci da rashawa da aka kafa.