Dokar kasar Nijar ta hana farautar Barewa sai in da kwakkwaran dalili. Mutanen dake farautar irin wadannan dabbobin suna sayar da su ne ga masu hannu da shuni,
Kanal Abdulrahaman Yakuba, jami’in gandun daji a jihar Damagaram, yace sun kama motar fari da barewa guda hudu a ciki amma biyu daga cikinsu sun mutu daga baya kuma suka cafke wasu guda shida a lokuta dabam dabam. Jami’in ya kara da cewa yanzu haka mutane biyu da aka kama da dabbobin na hannu kuma ana shirin mika su gaban hukuma.
To ko menene makomar wadannan dabbobin da aka kama? Kanal Abdulrahaman yace za a maida su daji don su ci gaba da rayuwa da sauran ‘yan uwansu.
Ya kara da yin kira ga jama’a akan su taimaka wajen sanar da hukuma akan duk wani abu da suka gani da zai iya cutar da wadannan dabobin.
Musa Mudi, wakilin wata kungiya da ake kira kwalliya, mai yaki da farauta a Nijar yace zasu bada goyon baya wajen ganin an kare wadannan dabbobin, saidai yace babbar matsalar da suke fuskanta ita ce yawancin lokuta basa samun bayanai akan lokaci. Ga Karin bayani a cikin sauti.
Facebook Forum