Accessibility links

Labari da Dumi-Duminsa

Ayatollah Khamenei Ya Zargi Abokan Gaba da Haddasa Rikicin Kasarsa


Shugaban addini na Iran, Ayatollah Ali Khamenei

A jawabin da ya yi ta kafar talibijan Iran, Ayatollah Ali Khamenei ya dora ma abokan gaba alhakin haddasa zanga zangar da 'yan kasar suka fara tun makon jiya da yanzu ta lakume fiye da rayuka ishirin

Yau Talata shugaban addinin Iran Ayatollah Ali Khamenei ya zargi abokan gabar Jamhuriyar ta Musulunci da laifin tayar da mummunar zanga-zangar kin jinin manufofin gwamnati da aka faro tun a makon da ya wuce.

Gidan talabijan na kasar Iran, ya ce an kashe wasu karin mutane tara cikin daren jiya, yayin zanga-zangar adawa da gwamnatin, wadda ya kara adadin wadanda suka mutu zuwa 20 sakamakon zanga-zangar da ta shafi tattalin arzikin kasar da aka fara kusan karshen makon da ya gabata.

A cewar rahoton, an kashe mutane shida a wani ofishin 'yan sanda a birnin Qahdarijan a wata arangama tsakanin ‘yan sanda da masu zanga zangar da suka yi kokarin satar bindigogi.

Kafofin yada labarai na kasar sun ce an kashe wani dan sanda a Najafabad.

Shugaban Amurka Donald Trump, ya isar da sako a shafin sa na yanar gizo na Twitter, akan al'ummar Iran yau Talata inda ya ce, al'ummar Iran sun tashi tsaye domin kau da mulkin danniya a kasar.

Shugaban kasar Iran, Hassan Rouhani, ya lashi takobin cewa, jami'an tsaro za su maida martani akan 'yan zanga-zangar da kuma waddanda suka karya doka.

An kama daruruwan masu zanga-zangar tun lokacin da aka fara a ranar Alhamis a Mashhad, kafin zanga zangar ta yadu zuwa wasu sassan kasar.

Facebook Forum

XS
SM
MD
LG