China Da Amurka Sun Gana Akan Batun Cinikayya

Shugaban China Xi Jinping ya gana da wasu wakilan Amurka dake tattaunawa akan batun cinikayya tsakanin kasashen biyu a Beijing yau Jumma’a, yayinda Chinar da Amurka ke kokarin cimma yarjejeniyar kasuwanci.

Sakataren ma’aikatar baitulmanin Amurka Steven Mnuchin ya rubuta a shafin sa na Twitter yau Jumma’a cewa, shi da wakilin Amurka akan batun cinikayya Robert Lighthizer sun yi wani muhimmin zama da mataimakin firayin ministan China Liu He.

Za a ci gaba da yin wani zagayen zaman shawarwarin cikin mako mai zuwa a nan birnin Washington, a cewar kafafen yada labaran China.

Wani babban mai bada shawara akan tattalin arziki a fadar White House ya bayyana kwarin Gwiwar sa akan zaman shawarwarin da ake yi tsakanin Amurka da China.