Hukumar dake sa ido kan abinci da magunguna a nan Amurka, ta amince da wata fasahar da ake sakawa a jikin kwayar magani.
Kwayar maganin da ake kira Abilify Mycite a turance, wacce ake amfani da ita wajen warkar da cututtukan da suka shafi tabin hankali, an saka mata wata kwayar na’urar da za ta rika bibiya tare da bai wa likitoci da masu jinya damar gane ko marasa lafiya suna shan magani akai-akai, kamar yadda aka rubuta masu.
“Dabarar bibiyan ko an hadiyi maganin da ake bai wa masu tabin hankali, zai iya taimakawa marasa lafiyan,” a cewar Mitchell Martin, shugaba a sashen kula da magungunan masu tabin hankali da cibiyar yin nazari da bincike kan abinci da magunguna ta FDA.
Ya kara da cewa, “hukumar ta FDA ta amince da amfani da fasaha wajen samar da magunguna, kuma ta himmatu wajen yin aiki tare da kamfanoni, domin a fahimci yadda ilimin fasaha zai iya taimakawa marasa lafiya da masu ba da magunguna.”
Facebook Forum