Julius Malema Na Afirka Ta Kudu Ya bayyana gaban Kotu

Dan siyasar Afirka ta Kudu, Julius Malema, ya bayyana a gaban kotu domin fuskantar tuhume-tuhume na batar da sawun kudaden haramun, zargin da shi da magoya bayansa suka ce wata makarkashiyar siyasa ce kawai.

Malema, daya daga cikin masu sukar lamirin shugaba Jacob Zuma, ya bayyana gaban kotun dake Polokwane yau laraba a bayan da ya mika kansa ga ‘yan sanda.

A ranar jumma’ar da ta shige, hukumomi suka bayarda takardar iznin kamo Malema, kuma magoya bayansa da yawa sun kwana har zuwa yau laraba a kofar caji ofis na ‘yan sanda inda aka tsare shi.

Tuhumar da ake yi masa ta samo asali daga wasu ayyukan kwangilar da ake zargin an yi cuwa-cuwarsu a gundumar da Malema yake. Hukumomi suka ce yayi amfani da kudaden cuwa-cuwar kwangilar wajen sayen gona da wata motar alfarma.

Hudu daga cikin abokan huldarsa sun bayyana gaban kotu jiya talata dangane da tuhume-tuhume irin wannan.