Wasu ‘yan kunar bakin wake biyu sun tarwatsa kawunansu a babban birnin Iraqi a yau Litinin, suka kashe mutane akalla 26 da raunana wasu da dama.
Bama-baman sun tarwatse ne a dandalin Tayran dake tsakiyar birnin Bagadza a lokacin cunkoson masu zuwa aiki da safiya. Wannan wurin cibiyar hada hadar kasuwanci ne, kuma akwai leburori dake taruwa don neman aiki.
Babu kungiyar da ta dauki alhakin kai wannan hari amman hare haren da suka gabata can baya dai kungiyar ISIS ce suka kai su.
Kungiyar ta mamaye mafi yawan sassan arewaci da yammacin Iraqi na tsawon shekaru fiye da uku.
Harin da Sojojin Iraqi tare da hadin gwuiwar Amurka suka rika kaiwa ta sama ne ya taimaka wajen korar kungiyar ta ISIS daga manyan biranen kasar da wasu sassan da ta mamaye.
A watan da ya gabata ne Firayim Minista kasar Haider Al-Abadi, ya bayyana nasarar fatattakar mayakan kungiyar daga wuraren da suka kama, amma kuma har yanzu ana fuskantar hare-haren ‘yan ta’addan a sassa dabam dabam na Iraqi.