Accessibility links

Wani jagora a kungiyar 'yan ta'addar Al-shabab ya mika wuya ga gwamnatin kasar Somalia.

Jami’an leken asiri na Somaliya, sun ce wani babban jagoran ‘yan tsagera na kasar, wanda aka yi shekara da shekaru ana nemansa, ya mika kansa ga gwamnati.

A yau lahadi da asuba, Mukhtar Robow Ali, wanda aka fi sani da sunan Abu Mansour, ya gana da wakilan gwamnati a makwancinsa dake wani kauye mai suna Abal a kudu maso yammacin Somaliya, daga bisani kuma aka dauke shi zuwa babban garin dake wannan yanki, watau Huddur.

Shine Moallim Nurow, shine kwamandan zaratan sojojin gwamnati a yankin kudu maso yammacin Somaliya. Kuma shi ya jagoranci tawagar gwamnati da ta samu isa sansanin Robow a jiya asabar.

Ya fadawa sashen Somaliya na VOA cewa ya gana da kwamandan a bakin daga a Abal, inda mayakan kwamandan da ya canja shekar da na al-Shabab suka shafe kwanaki suna gwabzawa.

Yace a bayan da suka gana ne suka yarda cewa zasu koma da shi garin Huddur. Yace ina tabbatar muku a yanzu haka yana Huddur, kuma ga ni tare da shi.

Robow ya sha rike mukamai kamar na kakaki, da ministan tsaro da kuma mataimakin shugaba a kungiyar al-Shabab. Yana daya daga cikin shugabannin kungiyar kalilan da suka rage wadanda suka samu horaswa tun farko a kasar Afghanistan.

Wani babban jami’in leken asiri na Somaliya yace Robow ya fadawa jami’an gwamnati cewa ya sauya sheka ne daga al-Shabab kuma yana son yayi aiki tare da gwamnatin Somaliya.

A yanzu haka dai, Robow yana da mayaka kimanin 400 a sansaninsa dake Abal, kilomita 18 a kudu da Huddur. Wannan zai iya zama canja sheka mafi girma da muhimmanci idan har shi da mayakan nasa suka koma bangaren gwamnati.

Facebook Forum

XS
SM
MD
LG