An ba Divina Maloum wannan lambar yabon ne sabili da kokarinta na yayata batun ‘yancin kananan yara da kuma gargadinsu kada su shiga kungiyoyin dake daukar makamai kamar Kungiyar Boko Haram
Daruruwan yaran makarantu a Yaounde, sun kafa ido a akwatunan talabijin ranar Laraba suna tafawa lokacin da aka ba Divina Maloum lambar yabon wanzar da zaman lafiya ta kananan yara, ta shekara ta dubu biyu da goma sha tara, a birnin Hague. A daidai lokacin da ake bukin ranar kananan yara ta duniya.
Maloum ta kafa wata kungiya da ake kira Kananan yara masu hankokoron zaman lafiya da ake kira "Children for Peace" “ da turanci, a shekara ta dubu biyu da goma sha hudu bayanda ta ziyarci arewacin kasar inda Kamaru ke iyaka da Najeriya, wurin da kungiyar Boko Haram ta kashe sama da mutane dubu ishirin da bakwai ta kuma raba sama ta miliyan biyu da matsugunansu.
Yanzu kungiyar "Children For Peace" tana da membobi kananan yara dari a yankuna goma na kasar Kamaru, Kungiyar ta kuma shirya taruka tsakanin al’umma da kuma kafa kulob kulob na wanzar da zaman lafiya a masallatai, wadanda suka hada kai da sauran yara, suka kuduri aniyar nisanta kansu da tsats-tsauran ra’ayi.
Maloum tace ta hakikanta cewa, kowa yana iya taka rawa a sami zaman lafiya tsakanin al’umma.
Facebook Forum