Accessibility links

Dubban mutane suka yi dafifi a kimanin manyan biranen kasar Mexico ishirin jiya Lahadi domin yin Allah wadai da shirin shugaban Amurka Donald Trump na gina ganuwa kan iyakar kasashen.

Jami’an kasar Mexico sun yi kiyasin cewa, kimanin mutane dubu talatin ne suka yi jerin gwano a biranen kasar biyu mafiya gima, Mexico city, da kuma babban birnin kasar Guadalajara.

Masu gangamin sun rike tutar kasar da kuma kwalaye dake bakanta Trump, da aka yi rubutu da turanci da kuma spaniyanci.

Bari gwamnatin Trump ta sani cewa, ba zamu mika wuya bori ya hau ba. Kasar Mexico bata taba mika wuya ba. A nan muna da jarumawa wadanda suka san ya kamata, da kuma sanin bukatar rungumar kowa. A nan ina ganin yara da manya, matasa da dattawa. Wannan yana nufin kasar Mexico zata ci gaba.

Masu zanga zangar sun kuma kushewa shugaban kasarsu Enrique Pena Nierto da suka ce, shugaban jeka-na-yika ne, wanda a ganin idonsa ake fama da kazamin cin hanci da rashawa da kuma tashe tashen hankali a kasar.

XS
SM
MD
LG