Yau ake jana’izar fitacciyar mawakiya da ‘yar wasar fina finan nan wadda ta sami lambobin yabo ta Grammy Whitney Houston
Yau ake jana’izar fitacciyar mawakiya da ‘yar wasar fina finan nan wadda ta sami lambobin yabo ta Grammy Whitney Houston, a garin haihuwarta Newark dake jihar New Jersey, kusa da birnin New York.
Fitattun mawaka da ‘yan wasan fina finai zasu rufawa danginta baya wajen karrama ta da kuma yi mata rakiya ta karshe a majami’ar Hope Baptist inda Houston ta yi waka a kwaya lokacin tana budurwa.
Jiya jumma’a da yamma danginta suka halarci wani shirin jana’izar ganinta na karshe a gidan shirya jana’iza.
Mawakar da zasu yi waka a wajen jana’izar yau sun hada da Steve Wondor da Aretha Franklin, ana kuma kyautata zaton mijinta na da, mawaki Bobby Brown zai halarci jana’izar.