An Yankewa Salman Khan Hukuncin Shekaru Biyar

Mayu 06, 2015

Usman Kabara

Salman Khan yana zaune a cikin mota

Wata kotu a India, ta yankewa shahararen dan wasan kwaikwayon nan na Bollywood, Salman Khan hukuncin zaman gidan yari na tsawon shekaru biyar, bayan da ta same sa da laifin kade wani mutum har lahira a shekarar 2002 ba tare da ya tsaya ya duba mutumin ba.

WASHINGTON, D.C. —

A yau Laraba, wani alkali a kotun Mumbai ya yanke hukuncin bayan da aka same sa da laifin.

A baya Khan ya fuskanci tuhumar zaman gidan yari na tsawon shekaru goma ne.

Masu gabatar da kara sun yi zargin cewa Khan ya sha barasa ne a lokacin da motarsa kirar Toyota ta abka kan wasu mutane biyar da ke bacci a gefen titi, inda nan take guda ya mutu sannan hudun suka samu raunuka.

Khan mai shekaru 49, ya musanta cewa shi ke tuka motar a lokacin da hadarin ya faru, ana kuma sa ran zai daukaka karar a kotun da ta ba damar yin hakan.

Fiye da sheakru 12 ke nan aka kwashe ana wannan shari'a sai a wannan karo aka yanke mai hukunci.