Ana Ci Gaba Da Kwashe Fararen Hula Daga Baghuz

An ga wasu manyan motoci dauke da fararen hula yau Jumma’a suna fita daga kauyen Baghuz dake gabashin Siriya, tungar mayakan ISIS ta karshe da suka ayyana a matsayin daularsu.

Nan take dai ba a tabbatar da adadin fararen hular da suka rage a kauyen ba dake kusa da iyakar Iraki.

Kamfanin dillancin labaran Associated Press ya bada rahoton cewa wasu motoci samfurin a-kori-kura da aka danawa bindigogi, mallakar dakarun Siriya da Amurka ke marawa baya ne suka raka ayarin motocin fararen hular.

Sabbin hare-haren da aka kai jiya Alhamis, sun auna wajen kauyen Baghuz ne, kwana daya bayan da aka kwashe fararen hula 2,000 daga wurin.