Kasar Bangladesh za ta gina sansanin ‘yan gudun hijira mafi girma a duniya, wanda zai dauki mutane sama da rabin miliyan ‘yan kabilar Rohingya, wadanda suka tsere daga Myanmar a cewar hukumomi.
‘Yan gudun hijirar wadanda suke warwatse a sansanoni 23 akan iyakar kasar, za su koma wannan babban sansani da ke Cox’s Bazaar, kamar yadda Ministan kula da aukuwar bala’i da ba da agaji, Mofazzal Hossain Chowdhury ya fada a jiya Alhamis.
Ya kuma kara da cewa za a kulle dukkanin sauran sansanonin, idan aka maida su wuri guda, yana mai cewa za su maida hankali ne kan ‘yan gudun hijirar Myanmar.
Kwararar ‘yan gudun hijirar kabilar Rohingya zuwa Bangladesh daga watan Agusta, ya sa adadinsu ya haura sama da dubu 800, tun daga wadanda suka fara shiga kasar daga shekarar 1978.
Sansanin ‘yan gudun hijira mafi girma a duniya shi ne na Bidi-Bidi da ke Uganda, wanda ke dauke da mutanen da aka yi kiyasin za su kai dubu 285.
Wanada ke biye da shi ne sansanin Dadaab da ke Kenya, wanda ke dauke da mutane dubu 245.
Facebook Forum