Accessibility links

Labari da Dumi-Duminsa

China Ta Ware Dala Biliyan 60 Don Bunkasa Kasashen Afirka


Taron kolin China da kasashen Afirka

Kasar China ta ware wasu makudan kudade da take shirin zuba hannun jari a kasashen Afirka, domin farfado da nahiyar.

A wajen babban taron koli na (FOCAC) da ake gudanarwa tsakanin shugabanin kasashen Afirka da China karo na 7, shugaba Xi Jinpin ya bayyana cewa akwai bashi da tallafi na musamman na dalar Amurka Miliyan dubu 60, da kasarsa ta ware don bunkasa fannoni daban-daban na rayuwa da kuma inganta manyan aiyuka a kasashen Afirka.

Gwamnan jihar Jigawa, Abubakar Badaru, na daga cikin tawagar shugaba Muhammadu Buhari. Wanda kuma ya ce Najeriya na daga cikin manyan kasashen Afirka da zasu bukaci kudi dayawa daga cikin kudin da aka ware.

Da yake yiwa Sashen Hausa na Muryar Amurka ‘karin haske kan yadda Najeriya za ta ci moriyar kudaden da aka ware, gwamna Badaru, ya ce aikin gina tashar wutar lantarki a tsaunin Mambila, da ayyukan gina layin dogo da ake shirin yi a fadin kasar, da kuma aikin sake farfado da titunan da suka lalace, duk na daga cikin manyan ayyukan da Najeriya za ta nemi tallafi aiwatar da su.

Cikin kudaden da kasar China da ‘yan kasuwarta suka ware don tallafawa kasashen Afirka, akwai dala milyan dubu 15 da zasu kasance tallafi na musamman da kuma basussukan da basu da kudin ruwa, akwai kuma dala milyan dubu 20 da za a bada bashi domin tsara manya-manyan ayyuka a kasashen Afirka.

Taron dai zai baiwa manyan ‘yan kasuwar China karfin gwiwa su saka hannun jari na akalla dala Miliyan dubu 10 domin bunkasa saka hannun jari da cinikayya tsakanin kasashen Afirka da kasar China.

A lokacin da shugaban kasar Najeriya Muhammadu Buhari, ya ke jawabi wajen taron, ya ce gwamnatinsa ta samu tallafi da gudunmawa da basussuka daban-daban da ya haura dala Miliyan dubu biyar, wanda gwamnatin ta yi amfani da su wajen yin manya-manyan ayyuka na ‘kasa, kamar layin dogo da gina manyan hanyoyi da kuma sha’anin noma, wandan suka kawo sauki da gina rayuwa ga al’ummar Najeriya.

Domin karin bayani saurari hirar gwamnan jihar Jigawa Abubakar Badaru da Sahabo Imam Aliyu.

please wait

No media source currently available

0:00 0:06:01 0:00

Facebook Forum

XS
SM
MD
LG