Accessibility links

Labari da Dumi-Duminsa

Facebook Zai Fara Gudanar da Manyan Ayyuka Daga Najeriya


Tambarin Facebook

Kamfanin sada zumunta na Facebook ya sanar da cewa zai bude ofishi a birnin Ikko da zai zama cibiyar gudanar da ayyukan wadansu sassan kamfanin da suka hada da sashen kasuwanci, da sasen kula da hadin guiwa, da kuma tsare tsaren harkokin sadarwa.

A cikin sanarwar da shugaban gudanar da sabbin tsare tsare na kamfanin Ime Archibong ya fitar, Facebook ya bayyana cewa, ofishin da zai fara aiki a shekara ta 2021, zai kasance irinsa na farko a nahiyar Afrika da zai kunshi tawagar injiniyoyi.

Sanarwar ta kara da cewa, “Bude sabon ofishinmu a Lagos zai samar da sabuwar damar bunkasa hanyoyin sadarwa na internet daga nahiyar Afrika zuwa sauran kasashen duniya. Muna ganin mutane masu baiwa da kuma kwarewa a fannin sadarwar internet a duk fadin Afrika.. bude sabon ofis din da za mu yi zai samar da damar kirkiro da ababan da zasu amfani nahiyar Afrika da kuma sauran kasashen duniya nan gaba, karkashin jagorancin ‘yan Afrika.”

Kamfanin Facebook ya fara hada hannu da kwararru a fannin fasaha a birnin Ikko a shekara ta dubu biyu da goma sha takwas kafin fadada huldar tare da bude karamar cibiyar gudanarwa da ke tallafawa kanana da matsakaitan cibiyoyin kasuwanci a nahiyar Afrika ta wajen samar da horarwa da zata taimaki ‘yan kasuwan bunkasa harkokin kasuwancinsu.

A shekara ta 2015 kamfanin Facebook ya bude ofishin shi na farko a Afrika a birnin Johanneshurg na Afrika ta Kudu da nufin tallafawa wadanda suke amfani da dandalin. Kamfanin ya kuma bayyana cewa yana taimakawa wajen bunkasa harkokin kasuwanci daga matakin kasa zuwa yanki da kuma kasashen duniya, da ya hada da tallafawa sama da kananan cibiyoyin kasuwanci 900 da annobar Coronavirus ta shafa a kasashen nahiyar Afrika.

  • 16x9 Image

    Grace Alheri Abdu

    Grace Alheri Abdu  babbar Edita ce (Managing Editor) a Sashen Hausa na Muryar Amurka wadda ta shafe sama da shekaru 30 tana aikin jarida. Tana da digiri na biyu a fannin dokoki da huldar diplomasiyar kasa da kasa, da kuma digiri na biyu a fannin nazarin addinan al'adun gargadiya na kasashen Afrika.

Facebook Forum

XS
SM
MD
LG