Kafar yada labarai ta gwamnati a Sudan ta bayar da rahoton cewa Firai-Ministan kasar ya na cikin koshin lafiya, bayan an so a halaka shi a wani hari da aka kai mishi a yau Litinin.

Gidan talabijin na kasar ya ce Abdulla Hamdok yana kan hanyar sa ta zuwa ofis ne, lokacin da aka kai wa ayarin motocinsa hari da Bom a Khartoum babban birnin kasar.

Babu wani dai da ya dauki alhakin harin.

Hamdok, dai ya zama Firai Ministan kasar ne a watan Augusta bayan da aka cire shugaba Omar Al-Bashir mai mulkin kama karya, bayan zanga-zanga da aka sha yi a fadin kasar ta nuna adawa da gwamnatinsa.

Ana dai tsare da Bashir a gidan kurkuku na Kober, inda ake tsare da mafi akasarin masu adawa da shi, kuma aka gana musu azaba.

Gwamnatin Sudan ta ce zata mika Al-Bashir ga kotun hukunta manyan laifufuka ta duniya, don gurfanar da shi.