‘Yan wasan Ingila a gasar cin duniya ta mata da ake yi a Australia tare da hadin gwiwar New Zealand za su hada hanya da tawagar Najeriya a ranar Litinin mai zuwa a zagayen ‘yan 16.
Ingila ta doke China da 6-1 wasan da suka buga a ranar Talata yayin da a ranar Litinin Najeriya ta tashi canjaras da Jamhuriyar Ireland a haduwar da suka yi.
Ita dai Ingila ta lashe wasannin uku a jere ba tare da ta shan kaye ba, yayin da ita kuma Najeriya ta yi canjaras sau biyu ta kuma shammaci Australia da ci 3-2.
Zagayen na ‘yan 16 zai zamanto na kwaf daya ne, wato duk wanda aka yi a nasara akansa, zai fice daga gasar.
Najeriya ita ce kasar da ta fara tsallakawa zagayen na ‘yan 16 yayin da take mataki na 40 a iya taka leda a duniya a fagen wasan kwallon kafar mata bisa kididdigar FIFA.
Ingila ita ce ta hudu a duniya a iya taka leda a fannin kwallon kafar mata.
Dandalin Mu Tattauna