Iraqi: Kawanyar Da Masu Bore Suka Yi wa Ofishin Jakadancin Amurka

A yau Laraba Jami’an tsaro, sun harba barkonon tsohuwa domin tarwatsa masu zanga zanga a bakin ofishin jakadancin Amurka da ke Bagadaza, zanga zangar da mayakan da ke samun goyon bayan Iran ke gudanarwa, wacce ta shiga yini na biyu a yau.

Da dama daga cikin masu zanga zangar sun kafa tantuna a bakin ofishin inda suka kwana a waje, bayan da a jiya Talata suka yi nasarar ketare shingen da ke bakin ofishin, suka yi ta cinna wuta.

Shugaban Amurka Donald Trump a jiya Talata, ya ce zai rike Iran akan duk wata barna da ta faru ko wani rauni da aka ji wa wani a ofishin.

Amma ya kuma yabawa jami’an tsaron Amurka da suka kare ofishin jakadancin.

“Ina ga sun yi kokari, dakarunmu sun yi abin a zo a gani, kuma sun isa wurin cikin dan kankanin lokaci.” Trump ya ce.

Sai dai yayin da yake ganawa da manema labarai da yammacin jiya Talata, Trump ya kore yiwuwar fadawa Iran da yaki.