Fitaccen masanin girke-girke, wanda ya shahara wajen yin tsokaci kan dandanon abinci a duniya, Anthony Bourdain ya rasu, yana mai shekaru 61.
Abokin Bourdain, Eric Ripert ne ya tsinci gawarsa a dakin otel dinsa da safiyar jiya Juma’a a Faransa, inda suka je aiki kan wani shiri da za a watsa a kafar talbijin ta CNN, a shirin da ake wa lakabi da “Parts Unknown” a turance.
A cewar gidan talbijin din na CNN, Bourdain ya kashe kansa ne.
An haifi Bourdain a New York, ya kuma yi kuruciyarsa ne a Leonia, wata unguwa da ke wajen birnin New Jersey.
Ya kammala karatunsa na jami’a a makarantar koyon girke-girke ta Amurka a shekarar 1978.
Daga nan ne kuma ya samu damar yin aikace-aikace a gidajen sayar da abinci a New York, inda ya samu daukaka daga mukamin mai wanke-wanke har zuwa shugaban girke-girke.
Kafin ya fara aiki da CNN a shekarar 2013, Anthony ya jagoranci wani shirinsa na kansa da yake tafiye-tafiye mai suna “No Reservations.”
Facebook Forum