Najeriya: Adadin Wadanda Suka Kamu Da COVID-19 Ya Zarta 8,000

Hukumar kula da cututtuka masu yaduwa ta Najeriya da ake kira NCDC a takaice ta sanar da cewa an samu karin mutum 229 da suka kamu da cutar COVID-19.

Gaba dayan adadin wadanda suka kamu da cutar yanzu ya kai 8,068 a kasar.

Jihar Legas da ke kan gaba a wajen yawan masu kamuwa da cutar ta samu karin mutum 90 da suka kamu da cutar ta coronavirus, a cewar sanarwar da NCDC ta fitar a shafinta na Twitter.

Sauran jihohin da aka samu karin masu cutar sun hada da Katsina inda aka samu mutum 27, 26 a Imo, 23 a Kano,14 a babban birnin tarayya Abuja, 12 a Filato,

Sauren jihohin sun hada da Ogun mai mutum 9, 7 a Delta, 5 a Borno, 5 a Rivers, 4 a Oyo, 3 a Gombe, 2 Osun, 1 a Anambra, 1 a Bayelsa.

Ya zuwa daren ranar Litinin 25 ga watan Mayu, mutum 2,311 suka warke daga cutar, yayin da wasu su 233 suka mutu.