Yadda Aka Sallami Boris Johnson Daga Asibiti

An sallami Firai Ministan Birtaniya Boris Johnson daga asibiti bayan da aka masa jinyar shu’umar cutar nan ta Coronavirus a dakin 'yan gobe da nisa.

To amma ba zai koma bakin aiki nan take ba, a cewar wata sanarwa daga ofishin Firai Ministan.

Sanarwar ta kara da cewa zai ci gaba da murmurewa a gidansa dake wajen gari.

Johnson ya kwanta a asibitin St. Thomas ne dake birnin Landan na tsawon mako guda, bayan kwana 10 da gano cewa ya kamu da cutar ta Coronavirus.