Bayan da ganawarsu ta baya-baya da shugabannin jam’iyyar Democrat ta kare da ayyana cewa “bata lokaci ne kawai” shi kuma Sanata Chuck Schumer ya kwatanta shugaba Trump a matsayin wanda ba ya iya danne fushinsa, a yau Alhamis shugaban Amurka Donald Trump zai je bakin iyakar Amurka da Mexico.
Ziyarar ta shugaban, zuwa McAllen a jihar Texas, za ta kunshi tarurruka akan tsaron iyaka da kuma zuwa wani ofishin jami’an sintirin iyaka, da kuma yankin iyakar da ke wajen rafin Rio Grande.
Bayannan Jami’an kwastam da na tsaron bakin iyaka sun nuna cewa a yankin kwarin Rio Grande ne cikin ‘yan shekarun nan jami’ai suka fi kama mutanen da suka yi kokarin ketare iyakar zuwa cikin Amurka ba bisa ka’ida ba. A shekarar 2017, bayanai sun nuna cewa a yankin an kama mutane kashi 44 cikin 100 da ke kokarin tsallake iyaka.
Kungiyoyin kare hakkokin bil’adama a jihar Texas da ke kalubalantar bukatar Trump ta a bashi dala biliyan 5 don gina katanga da kuma manufofin gwamnatinsa akan baki, na shirin yin zanga-zanga yau Alhamis a falin tashar jiragen saman McAllen.
Facebook Forum