Accessibility links

Labari da Dumi-Duminsa

Batu Tabbas A Cimma Burin Sake Obamacare


Shugaban masu rinjaye a majalisar datijan Amurka Mitch McConnell
Shugaban masu rinjaye a majalisar datijan Amurka Mitch McConnell

Har yanzu da saura rina a kaba a yunkurin 'yan jam'iyar Republican na soke tsarin inshorar Amurka da ake kira Obamacare

Sa’oi a bayan da 'yan majalisar dattijai na jam’iyar Republican suka kada kuri’ar fara muhawara kan yunkurin soke dokar fitaccen tsarin kula da lafiya na tsohon shugaban kasa Barack Obama, majalisar ta kasa amincewa da wani kuduri da zai bada damar cimma wannan gurin.

Jiya talata ‘yan majalisar suka kada kuria inda arba’in da uku suka goyi baya hamsin da bakwai kuma suka ki amincewa da kudurin da shugaban masu rinjaye Mitch McConnell ya gabatar na kawo karshen fadada tallafin kiwon lafiya da ake ba marasa galihu, da zabtare tallafin da ake ba masu karamin karfi domin biya kudin inshora na kashin kansu, da kuma kawar da harajin da ake yiwa wadanda basu sayi inshorar kula da lafiyarsu ba.

Matakin ya kuma hada da gyaran da dan jam’iyar Republican mai wakiltar jihar Texas Ted Cruz ya yi da zai sa kamfanonin inshora su samar da damar kula da lafiya da bai kai wadda ke karkashin tsarin inshora na Obamacare ba.

Kuri’ar da aka kada jiya talata da dare, tana cikin jerin kuri’u da za a kada a cikin wannan makon, a yunkurin jam’iyar Republican na sokewa da kuma maye gurbin tsarin inshorar da aka fi sani da Obamacare. Majalisar dattijai zata fara muhawara ne bayan yunkurin McConnell sau biyu a lokutan baya basu cimma nasara ba. Ko a wannan lokacin ma, kadan ya rage ya sake gamuwa da cikas, bayanda dukan ‘yan jam’iyar Democrat da kuma ‘yan jam’iyar Republican guda biyu suka ki amincewa, abinda ya sa aka yi kunnen doki a zauren, da kuri’u hamsin hamsin.

Sai da mataimakin shugaban kasa Mike Pence a matsayinsa na shugaban majalisar dattijai, ya kada kuri’ar raba gardama.

Dan jam’iyar Republican mai wakiltar jihar Arizona John McCain ya kada kuriar da kawo karshen ja in ja, wanda ya dawo majalisa ‘yan kwanaki kalilan bayan da aka gano yana da cutar sankarar kwakwalwa.

  • 16x9 Image

    Grace Alheri Abdu

    Grace Alheri Abdu  babbar Edita ce (Managing Editor) a Sashen Hausa na Muryar Amurka wadda ta shafe sama da shekaru 30 tana aikin jarida. Tana da digiri na biyu a fannin dokoki da huldar diplomasiyar kasa da kasa, da kuma digiri na biyu a fannin nazarin addinan al'adun gargadiya na kasashen Afrika.

Facebook Forum

XS
SM
MD
LG