Accessibility links

Har Yanzu Amurka Da Rasha Na Neman Hanyar Shawo Kan Rikicin Syria


John Kerry (Hagu) Sergie Lavrov (Dama)

Amurka da Rasha na duba sabbin hanyoyin da za su cimma matsayar da za ta kawo karshen zangon tsawon wata guda da aka kwashe babu alamun samar da maslaha kan yadda za a kawo karshen rikicin da ya dabaibaye birnin Aleppo na Syria.

Sakataren harkokin wajen Amurka John Kerry ne ya bayyana hakan, a ranar Juma’a.

A cewar Kerry, za a yi gwajin shawarwarin da aka bayar gabanin wata ganawa da jami’an diplomaisiyyan Amurka da Rasha za su yi a Geneve a mako mai zuwa.

Kerry ya yi wadannan kalamai ne yayin da suka gabatar da wani taron manema labarai da takwaran aikinsa na Italiya a birnin Rome, inda Kerry ya yi kiran masu ruwa da tsaki da su ci gaba da gudanar da ayyukan jin-kai a Aleppo.

Bayan kuma wata ganawa da ya yi da takawaran aikinsa na Rasha, Sergie Lavrov, Kerry ya ce ana fatan sabbin matakan da za a dauka za su kai ga samar da zaman tattaunawa tsakanin gwamnatin Shugaba bashar al- Assad na da ‘yan tawayen kasar.

Batun zaman tattaunawa tsakanin gwamnatin ta Syria da ‘Yan tawayen ya cutura, duk da yunkurin da aka faro tun daga shekarar 2014.

XS
SM
MD
LG